وكأنك ياأبو زيد ما غزيت

أرسمك

بس بشرط

وانا برسمك ماتبينيش م الحزن حاجه

خليها خاليه اللوحه ..

م اللون السواد

والهم

خليني ف عنيكي فارس

وإنت ف عيني أم

- كدبه يعني وهـ نعيشها سوا ..

متزوقين

وشويّتين ..

وكل شئ يرجع لأصله

واللي كان الخوف محاصره

هـ يرجع يحاصره ..

من جديد

وكإنك ياابو زيد ماغزيت

ولا رحت وجيت

ولافتش عليك ف الحلم فقير

والحلم ف بير ..

مليان حكايات ..

مليانه ..

أوقات بتهرب م الضمير الحي

تتغابي

ياضحكتين الورد ف الغابه

دخلوا الديابه ..

من كل بيت ,

وف كل حين

ومروّحين من غير عشا ..

أموات

والضرب ف الميت حرام

لكنه لسه بينضرب

ونفسه يعيش ..

واحد مايخدعنيش

ومايرسمليش الحلم ورده ..

أحمر وازرق ونبيتي

ارسمني - بس –

من غير شروط

أنا أصلي محتاجه موت

واحد يرسمني

ويعيد تسميتي

الشاعر
مراد ناجح عزيز