قصيدة في الشعر الملحون,لصاحبها عيدون المدعو بن حا

[center]بسم الله الرحمن الرحيم
*قصيدة في الشعر الملحون,لصاحبها عيدون المدعو بن حاحا شاعر البيض المعروف.الف هذه القصيدة الخاصة بوفاة المرحوم سي الحاج عبدالقادر "المدعو الحاج قادة" بن الحاج محمد, الذي يلوم فيها عين السخونة التي غرق بها المرحوم.*

أستغفر الله ولا حال يدوم***************والدنيا ما دومشي قاع نصدو
يبقى ربي الدايم الحي القيوم*************سبحان المولى الداري بعبادو
تعزاو شيوخنا في هذا اليوم ************والحاج المخطار وجميع ولادو
خدعت يا عين السخونة شيخ القوم************مولى العلم إلي دايما كتاب في ايدو
ماهو داري على ليلي قادي معزوم************وروا حين العين لبلاه توجدو
ماحشمتي ياعين من نبي شفيع القوم**********ما قلتي هذا بباه وجدو
ما قلتيش جارنا من قبل اليوم***************ولي قبضه مسكين للناس يمدو
طفيتي ذا الضوىوزدتيني لهموم*************بحديث العلوم منه نستفادو
أنا على الحاج قادة نفت اليوم***************ولي هو أذاه يهدملو سدو
دعيتك للي مايجيهش قاع النوم**************في الحق عمار لعباد بيدو
يتقسم ماك مع لمدون بروح قسوم************في حق الي عاشر فيك يتعدو
رحل البيض يعبر لك يفزع في قوم************مولى سبع اقباب هو وولادو
تولي رمال بقباب حموم******************عقارك مايزيدشي يقطع جهدو
حتى هي تمثلت كي الطير يحوم*************قالت ياحبيب هذا الراي تعيدو
يارجل وعلاش فيا راك تلوم***************وحديثك خليه يبقى في حدو
هذا مولى حال من بكري مفهوم************والزاوي كيفاش نخرج ضدو
هذا المشروع في كل الناس تعوم***********ولا واحد جات ذا القدرة بيدو
ذا السيد جاني بأجاله متموم**************تموله ليام لا وين يزيدو
ادعي ليه للأخرى يمشي مرحوم***********هو وصالحين للجنة يغدو
والناس الي معاه مايبق محروم***********غيرالمشركين راهم يترادو
تسامحت أنا وياها مبقاش المكتوم*********كل عشير يروح يبق في حدو
الصلاة على النبي بابا فطوم*************وصاحبه عشرة الناس اللي سعدو
سلكني كي تعود لخلايق مملوم***********والدنيا كلها ويتحاسب وحدو
يظهر من كان متخفي مكتوم************كتاب على اليمين نفرح لرفدو
الصلاة عليك قد حساب النجوم**********ومافاتت ليام بحساب عددو
صلى الله عليك قدمياه تهوم************والويدان تسيل بعناصر مدو
قد خلايق في البحر والحوت يعوم********وبابير معاه في الحب زادو
قد اللى هو زاد من حول اليوم**********وعمار اللي عاد راهم ما زادو
هذا النظم جبها من بعد الصوم ******* **في ثاني شوال كي فاتنا عيدو
الف وربعمئة واثنى عشرة مفهوم******* في الهجرية اذا انك تحسب عدو
بن حاحا جاب ذا الكلام متموم********** في الاخير تكون قرب لا ميدو
الصلاة على النبي في كل يوم******* ***والفين صلاة عليه مدام عبادو
تحفظ يا ربي الجمع اللي ملموم********** واجعل البركة ان شاء الله في اللي فعدو
* تمت بالخير عمت*
رحم الله الفقيد واسكنه فسيح جنانه اطلبوا له الرحمة والمغفرة